... ... ...
...
 












...
... ... ...
... ... ...
...
 
ڕاگه‌یاندن

با 06 ئاب بکه‌ینه ڕۆژی نه‌فره‌ت له‌شه‌ڕی خۆ کوژی

به‌ بۆنه‌ی 16 ساڵ تێپه‌ڕ بوون به‌سه‌ر مه‌رگه‌ساتی کۆمه‌ڵ کوژی ژن و منداڵی بێتاوانی کاک حوسێن و حه‌سه‌نی حاجی عه‌لی، کاک عومه‌ر چاو شین، کاک خالیدی سه‌ید وه‌سیم، کاک ئازادی مسته‌فای زێڕنگه‌ر و کاک عثمانی حاجی عه‌بدوڵا و هه‌موو ئه‌و بێتاونانه‌ی تر که‌ به‌ کۆمه‌ڵ بوونه‌ قوربانی یه‌ک گوله‌ تۆپی کورد کوژ له‌ ژێر زه‌مینێک له‌ قه‌ڵادزێ، ناوه‌ندی قه‌ڵادزێ سه‌ره‌خۆشی به‌که‌س و کاریان، خه‌ڵکی پشده‌ر، هه‌موو خه‌ڵکی کوردستان ڕاده‌گه‌یه‌نێت و پڕۆتستی له‌ ناوبردنی هه‌ر مرۆڤێکی کورد ده‌کات به‌ هه‌ر شێوه‌یه‌ک بێت.


له‌م بۆنه تاڵه‌دا که‌ له 06 ئابی 1994 به‌یه‌ک گوله‌ تۆپ 21 شه‌هیدی ژن و منداڵ و 8 برینداری لێکه‌وته‌وه، داوا له‌سه‌رۆکایه‌تی هه‌رێمی کوردستان ده‌که‌ین که‌ به‌بی جیاوازی به‌ ده‌م داواکاری قوربانیان و بێ سه‌ر و شوێنانی شه‌ڕی خۆ کوژی (برا، خوشک و منداڵ کوژی) یه‌وه بێن و پڕۆژه‌یه‌کی تۆکمه‌ له‌ ڕێگای که‌سانی شاره‌زا و ئه‌کادیمی له په‌ڕلمانی کوردستان ئاماده‌ بکه‌ن بۆ سڕینه‌وه‌ی ئاسه‌واری ده‌رونی له‌سه‌ر ژیانی که‌س و کاری ئه‌و قوربانیانه به‌ تایبه‌تی ‌و خه‌ڵکی کوردستان به‌گشتی.


هه‌روه‌ها له‌‌و بۆنه‌ تاڵه‌دا به‌ که‌س و کاری ئه‌و شه‌هیدانه‌ و هه‌موو بێ سه‌رو شوێنانی پشده‌ر ڕاده‌گه‌یه‌نین، که‌ ناوه‌نده‌که‌تان (ناوه‌ندی قه‌ڵادزێ بۆ داکۆکی کردن له‌ قوربانیان و زیانلێکه‌وتوانی ده‌ڤه‌ری پشده‌ر) کێسه‌که‌ی ئێوه‌ی پشت گوێ نه‌خستووه‌ و ناخات. به‌ڵام پێویستی به‌ کات، به‌ ئارامی و یه‌کگرتووی ئێوه‌ی به‌ڕێز هه‌یه، تا ده‌تواندرێ کێسه‌ گشتیه‌کان که‌ په‌یوه‌ندیان به‌ کۆمه‌ڵ کوژی، ڕاگواستن و بۆردومانه‌ یه‌ک به‌دوای یه‌که‌کانی حکومه‌تی پێشووی به‌غدا، ئێران و تورکیاوه‌ هه‌یه، به‌ ڕێگای یاسایی بگه‌یه‌ندرێته‌ به‌ر ده‌م دادگای باڵای تاوانه‌کان له‌ به‌غداد و ڕای گشتی له‌ جیهان. له‌م قۆناغه‌دا به‌ده‌نگه‌وه‌ هاتنی ئاهو ناڵه‌ی ئێوه‌ به‌ ئه‌رکی سه‌رکردایه‌تی یه‌کیه‌تی و پارتی ده‌زانین، بۆیه دوایان لێ ده‌که‌ین که به‌ لۆجیک و زانایانه په‌له‌ بکه‌ن بۆ دیاری کردنی بودجه‌یه‌کی تایبه‌ت بۆ سڕینه‌وه‌ی ئاسه‌واری ئه‌و زامانه.


به‌ڕێزان که‌س وکاری کوژراوان، تیرۆرکراوان و بێ سه‌رو شوینانی شه‌ری خۆ کوژی کورستان، ئازیزه‌کانتان له‌مڕۆدا له‌ به‌ هه‌شتی به‌رینه‌وه‌ داواتان لێ ده‌که‌ن، که‌ لێبوورده، به‌ ئارام و یه‌کگرتووبن. ئه‌و مه‌رگه‌ساته‌ی که‌ به‌سه‌ری گه‌لی کوردا ڕه‌ت بووه نه‌فره‌تی لێ بکه‌ن چونکا له‌ دووژمنانی گه‌لی کورد زیاتر که‌سی تر تێیدا به‌رنده‌ نه‌بووه.


با ڕۆژی 06 ی ئاب بکه‌ین به‌ ڕۆژی نه‌فره‌ت له ‌شه‌ڕی خۆ کوژی گه‌لی کورد، بۆ ئه‌وه‌ ی ببێته‌ ده‌رس و په‌ند بۆ هه‌تایه‌ هه‌تایه.

 

ده‌سته‌ی هه‌ڵسوڕێنه‌ری ناوه‌ندی قه‌ڵادزێ
بۆ داکۆکی کردن له‌ قوربانیان و زینلێکه‌وتوانی ده‌ڤه‌ ری پشده‌ر

04 ئابی 2010

 

...
... ... ...