... ... ...
...
 












...
... ... ...
... ... ...
...
 

ووته‌ی ده‌سته‌ی پشتیوانی پشده‌ر بۆ په‌ڕلمانی به‌ریتانیا

خوشک و برایانی به‌ڕێز

ئه‌مڕۆ یادی کاره‌ساتێکی مرۆیی گه‌وره‌ ده‌که‌ینه‌وه، کاره‌ساتێک که‌ ویژدانی گه‌له‌که‌مانی هه‌ژاند، کاره‌ساتێک که‌ هه‌رگیز ناشێ له‌ یادی خۆمانی به‌رینه‌وه‌.‌  سی وحه‌وت ساڵ له‌ مه‌وبه‌ر، له‌ ڕۆژی 24 ی نیسانی ساڵی 1974 دا، فڕۆکه‌ مه‌رگچێنه‌کانی ڕژێمی به‌عسی عێراق به‌ شێوه‌یه‌کی زۆر دڕندانه‌ شاری قه‌ڵادزێیان بۆردومان کرد و له‌ ماوه‌ی چه‌ند خوله‌کێکدا سه‌رۆکایه‌تی و که‌مپه‌کانی زانکۆی سلێمانی، چه‌ندین قوتابخانه، خه‌سته‌خانه، فه‌رمانگه‌ی حکومی، شوێنی گشتی، بازاڕ و چه‌ندین گه‌ڕه‌کیان کاول و خاپوور کردو.  له‌م کاره‌ساته‌دا به‌ سه‌دان که‌س شه‌هید و بریندار بوون که‌ زۆربه‌یان منداڵ و ژن و پیرو خوێندکاری زانکۆ بوون.  له‌ ڕاستیدا ئه‌مه‌ یه‌که‌مین کاره‌سات نه‌بوو که‌ تووشی ئه‌م شاره‌و به‌گشتیش تووشی ناوچه‌که‌ بێ به‌ڵام له‌ ڕووی دڕنده‌ییه‌وه‌ که‌م وێنه‌ بوو. چونکه‌ ئه‌م ناوچه‌یه‌ کاره‌ساتی دڕندانه‌ی وای هه‌رگیز به‌ خۆوه‌ نه‌بینی بوو.

شاری قه‌لادزێ که‌ ناوه‌ندی قه‌زای پشده‌ره‌ ده‌که‌وێته‌ باکووڕی خۆرهه‌ڵاتی شاری سلێمانییه‌وه‌.  ناوچه‌ی پشده‌ر که‌ ڕووبه‌ره‌که‌ی زیاتر له‌ 1300 کیلۆمه‌تری دووجایه‌و له‌ ناوچه‌یه‌کی شاخاوی سه‌ختدا هه‌ڵکه‌وتووه‌‌ له‌سه‌ر سنووری عێراق و ئێران، بۆ شۆرش و جووڵانه‌وه چه‌کدارییه‌کانی کورد بایه‌خێکی جیۆپۆله‌تیکی گرنگی هه‌بووه‌ و هه‌یه‌، هه‌ر بۆیه‌ ڕژێمه‌ دیکتاتۆره‌کانی عێراق به‌ شێوه‌یه‌کی دڕندانه‌ هه‌لسوکه‌وتیان له‌گه‌ڵ دانیشتوانی ئه‌م ده‌ڤه‌ره‌دا کردووه‌.

له‌ ساڵی 1974 دا کاتێک ڕێکه‌وتنی چوار ساڵه‌ی نێوان ڕژێمی به‌عسی عێراق و سه‌رکردایه‌تی ئه‌وکاته‌ی شۆڕشی کوردستان گه‌ییشته‌ بنبه‌ست و له‌ ئه‌نجامدا شه‌ڕ ده‌ستی پێکرده‌وه‌، ئه‌و کاته‌ زۆربه‌ی هه‌ره‌ زۆری مامۆستاو خوێندکارانی زانکۆی سڵیمانی ڕوویان کرده‌ شاری قه‌ڵادزێ و داموده‌زگاکانی زانکۆی سڵیمانی یان له‌و شاره‌دا دامه‌زرانده‌وه‌، که‌ به‌شێکی زۆریان له‌ بۆردومانه‌که‌ی 24 ی نیساندا به‌رکه‌وتن.

کاتێ له‌ ئازاری 1975 دا ڕێککه‌وتنی جه‌زائیر له‌ نێوان ئێران و عێراقدا مۆرکراو به‌م هۆیه‌وه‌ شۆڕشی کوردستان شکستی خوارد، هه‌ر زوو ڕژێمی به‌عس که‌وته‌ تۆڵه‌ کردنه‌وه‌ له‌ خه‌ڵکی ناوچه‌که‌و له‌ ساڵانی نێوان 1976 تا 1978 زۆربه‌ی هه‌ره‌ زۆری گونده سنوورییه‌‌کانی ئه‌و ناوچه‌یه‌ی ڕاگواست و خزاندنییه‌ ناو ئوردوگا زۆره‌ملێکانه‌وه‌.  ئه‌مه‌ جگه‌ له‌وه‌ی که‌وته‌ گرتن و له‌ سێداره‌دانی ژماره‌یه‌کی زۆر له‌ هاوڵاتیانی ناوچه‌که‌ یان گولله‌بارانکردنیان له‌ ناو گوندو ئاواییه‌کانی خۆیاندا.

ئه‌م زۆڵم و زۆردارییه‌ی ڕژێمی به‌عس وای کرد دانیشتوانی قه‌ڵادزێ له‌ یادی هه‌شته‌مین ساڵڕۆژی بۆردومانی قه‌ڵادزێ دا خۆپیشاندان بکه‌ن و ڕژێمیش هه‌ر وه‌ک لێی چاوه‌ڕون ده‌کرا به‌ ئاگر و ئاسن که‌وته‌ وێزه‌ی خۆپیشانده‌ران و له‌ ئه‌نجامدا دوو ژن شه‌هید کران و به‌ ده‌یانیش بریندار و زیاتر له‌ سه‌دکه‌سیش ده‌ستگیر کران که‌ زۆربه‌یان کچی خویندکار بوون.  به‌ڵام ئه‌م ڕاپه‌ڕینه‌ی خه‌ڵکی قه‌ڵادزێ بوو به‌ هۆی ئه‌وه‌ی که‌ خۆپیشاندانه‌کان گشت شاره‌کانی کوردستان بگرێته‌وه‌و نزیکه‌ی سێ مانگێک درێژه‌ی کێشا.
ڕژێمی به‌عس هه‌ر ده‌رفه‌تێکی بۆ هه‌ڵکه‌وتبێ به‌سه‌ریدا بازی نه‌داوه‌و له‌ ساڵی 1988 دا ئۆردوگای زۆره‌ملێی به‌سته‌ستێنی ڕاگواست و له‌ حوزه‌یرانی 1989 شدا شاری قه‌ڵادزێ و تێکڕای ناوچه‌که‌ی له‌گه‌ڵ خاک و خۆڵدا یه‌کسان کردو خه‌ڵکه‌که‌ی بۆ چه‌ندین شوێنی‌ جیاجیا ڕاگواست بێ ئه‌وه‌ی هیچ هه‌لومه‌رجێکی ژیانیان بۆ فه‌راهه‌م بکا و به‌م شێوه‌یه‌ سزای خه‌باتی خه‌ڵکی ناوچه‌که‌ی دایه‌وه‌.

ئێستا وا بیست ساڵێکه‌ هه‌رێمی کوردستان له‌ ژێر ده‌سه‌ڵاتی به‌غدا دانه‌ماوه‌و ماوه‌ی هه‌شت ساڵیشه‌ ڕژێمی به‌عس ڕووخاوه‌ که‌چی تاکو ئێستا خه‌ڵکی ناوچه‌که‌ رۆژانه‌ له‌ ژێر تۆپبارانی ئێران و بۆمبارانی فڕۆکه‌کانی تۆرکیادان بێ ئه‌وه‌ی حکومه‌تی عێراق یان حکومه‌تی هه‌رێم کارێکی وایان کردبێ که‌ سنوورێک بۆ ئه‌م کاره‌ساتانه‌ دابنێن.  سه‌رباری ئه‌وه‌، تا ئێستاش ناوچه‌که‌ وه‌کو پێویست خزمه‌تگوزاری پێنه‌گه‌یشتووه‌ که‌ له‌ ئاست ئه‌و کاره‌ساتانه‌دا بێ که‌ دووچاری ناوچه‌که‌ بۆته‌وه‌ وحکومه‌تی هه‌رێمیش وه‌ک پێویست به‌ده‌م داواکارییه‌کانیانی خه‌ڵکه‌که‌وه‌‌‌ ناچێ.

سه‌رباری هه‌موو ئه‌و کاره‌ساتانه‌ش که‌ له‌لایه‌ن ڕژێمه‌کانی عێراقه‌وه‌ به‌سه‌ر ناوچه‌که‌دا هاتووه‌، کاره‌ساته‌کانی شه‌ڕی ناوخۆش ئه‌وه‌نده‌ی تر باری خه‌ڵکی ناوچه‌که‌ی قورستر کرد که‌ له‌و میانه‌دا به‌ ده‌یان که‌سی بێتاوان شه‌هید و په‌ککه‌وته‌ بوون و هه‌ندێکیش تا ئێستا بێ سه‌روشوێنن.  لێره‌دا حکومه‌تی هه‌رێم به‌ به‌رپرسیار ده‌زانین له‌ ئاشکرا نه‌کردنی چاره‌نووسی ئه‌و گومکراوانه‌ و هیوادارین که‌سوکاریان له‌ چاره‌نووسیان ئاگادار بکاته‌وه‌.

ئێمه‌، تۆڕی پشتیوانی پشده‌ر، له‌ کاتێکدا سه‌ری ڕێز و نه‌وازش له‌ به‌رده‌م قوربانییه‌کانی ئه‌و تاوانه‌ دڕندانه‌یه‌دا داده‌نه‌وێنین، ڕاشی ده‌گه‌یه‌نین که‌ ئێمه‌ هه‌وڵ ده‌ده‌ین له‌ پێناوی ئه‌م ئامانجانه‌ی خواره‌وه‌دا:

به‌ جینۆساید ناساندنی تاوانه‌کانی بۆردومانی قه‌ڵادزێ و ڕاگواستنی ناوچه‌که‌ که‌ به‌ مه‌به‌ستی له‌ به‌ینبردنی دانیشتوانی ناوچه‌یه‌کی دیاریکراوی کوردستانه‌ که‌ ڕۆڵی به‌رچاویان له‌ خه‌باتی ڕزگاریخوازیی گه‌لی کوردستاندا هه‌بووه‌؛

قه‌ره‌بوو کردنه‌وه‌ی هه‌موو ئه‌وانه‌ی زیانی گیانی، دارایی، و ده‌روونییان به‌رکه‌‌وتووه‌ له‌ لایه‌ن حکومه‌تی ناوه‌ندیی عێراقه‌وه‌.

دانانی بودجه‌یه‌کی تایبه‌تی له‌ لایه‌ن حکومه‌تی ناوه‌ندی و حکومه‌تی هه‌رێمی کوردستان بۆ ئاوه‌دانکردنه‌وه‌ی ناوچه‌که‌و په‌ره‌پێدانی مرۆیی له‌ ناوچه‌که‌دا.

لێره‌دا، ئه‌م بۆنه‌یه‌ به‌ ده‌ر‌فه‌ت ده‌زانین که‌ داوا له‌ په‌رله‌مان و حکومه‌تی بریتانیا بکه‌ین که‌ قورسایی خۆیان به‌کار بهێنن بۆ ڕاگرتنی بۆردومانه‌کانی سه‌ر گونده‌کانی ده‌ڤه‌ره‌که‌ له‌ لایه‌ن تورکیاوه‌. 

ده‌سته‌ی پشتیوانی پشده‌ر
Pishdar Solidarity Team

28/04/2011

 

 

...
... ... ...