... ... ...
...
 












...
... ... ...
... ... ...
...
 
ڕاگه‌یاندن

له‌ده‌سته‌ی هه‌ڵسوڕێنه‌ری ناوه‌ندی قه‌ڵادزێ بۆ داکۆکی کردن له‌ قوربانیان و زیان لێکه‌وتوانی ده‌ڤه‌ری پشده‌ر
بۆ هه‌موو هه‌ڵسوڕێنه‌رانی کۆمیته‌کانی پشتیوانی له‌ ناوه‌ندی قه‌ڵادزێ‌ی به‌ڕێز، له‌ ناوه‌وه‌ و ده‌ره‌وه‌ی ووڵات



ڕوونکردنه‌وه‌ و پێزانین
به‌روار: 07. 05. 2010

سڵاوی پڕ خۆشه‌ویستی، خۆنه‌ویستی و یه‌کگرتوویتان لێ بێت
ڕێزداران خۆشه‌ویستان وێڕای ده‌ست خۆشانه‌ بۆ کاری خۆبه‌خشی و پشتیوانی له‌ روحی پاکی شه‌هیده‌کانتان و پاراستنی ڕووسوری سه‌روه‌ریه‌کانی ده‌ڤه‌ره‌‌ی پشده‌ر، به‌ یه‌کگرتوویتان، به خۆ دوور گرتنتان له‌ ده‌ست تێوه‌ردانی حزبه‌کان و لایه‌نه‌ سیاسیه‌کان به‌ دنیاتان سه‌لماند که‌ ده‌توانن به‌ خۆنه‌ویستی و به‌ بێ به‌رامبه‌ر ببنه‌ نوێنه‌ری که‌س و کاری شه‌هید و قوربانیانی ده‌ڤه‌ره‌که‌تان. هه‌روه‌ک چۆن له‌ 24. 04. 1982 و 04. 03. 1991 بوونه‌ پێشه‌نگ و ڕێچکه‌ شکێنی خۆنیشاندان و ڕاپه‌ڕینه‌کان له‌ ناو زانکۆ و کۆلیژه‌کانی هه‌ولێر، موصل و به‌غدا و زانکۆکانی تر، به‌وتافی (الجنود اخواننا، الفاشست اعداؤنا) ته‌لسمی ترسی دکتاتۆر ترین ڕژێمی سه‌رده‌متان ڕه‌وانده‌وه‌ و به‌غدا‌ی پایته‌ختان هه‌ژاند.
ڕێزداران خۆشه‌ویستان تاکه‌ رێگا بۆ داکۆکی کردن له‌ قوربانیان و زیان لێکه‌وتوانی گه‌له‌که‌مان و ناساندنی کێسه‌کانمان وه‌ک جینۆساید و ڕاگه‌یاندنی به‌گوێ‌ی دنیا، یه‌کیه‌تی و ته‌بای و خۆنه‌ویستی نێو ڕیزه‌کانی خۆمانه‌ و ڕێگا گرتنه‌ له‌ وه‌ی که‌ بۆ هیچ مه‌رامێکی شه‌خسی و تایبه‌تی دژایه‌تی هیچ لایه‌نێکی کوردستان بکه‌ین و یان ده‌سته‌مۆی بین.
هه‌روه‌ک هه‌موو لایه‌کتان ده‌زانن ناوه‌ندی قه‌ڵادزێ به‌شێوه‌یه‌کی قانونی، مه‌ده‌نی، دیموکڕاتی و سه‌رده‌میانه تێده‌کۆشێت بۆ داکۆکی کردن له‌ قوربانیان و زه‌ره‌ر مه‌ندانی ده‌ڤه‌ری پشده‌ر. هه‌روه‌ها شان به‌شان ڕێکخراوه‌ مه‌ده‌نیه‌کانی تر داکۆکی ده‌کات له‌ به جینۆساید ناساندی کێسه‌کانی هه‌موو ده‌ڤه‌ره‌کانی کوردستان هه‌روه‌ک کێسه‌کانی ده‌ڤه‌ره‌که‌ی خۆمان پشده‌ر.
ڕێزداران ئێمه‌ به‌ هیچ شێوه‌یه‌ک مافمان به خۆ  نه‌داوه‌ و ناده‌ین که‌ به‌بێ دیکۆمێنت و به‌ڵگه‌ سه‌نگه‌ر هه‌تا له‌دوژمنانی گه‌لی کوردستانیش بگرین، چ جای حزب و ڕێکخراوه‌کانی نێو خۆی کوردستان که‌ له‌ خوشک و برای خۆمان پێک هاتوون. به‌ڵام به‌ ئه‌رک و واجبی خۆمان داناوه‌ و ده‌زانین، که‌ داکۆکی له‌ هه‌ریه‌ک له‌ ئێوه‌ی به‌ڕێز بکه‌ین که‌ به‌بێ به‌رامبه‌ر و به‌ خۆنه‌ویستی، دوور له‌ ئیلتزامی حزبایه‌تی هاتوونه‌ مه‌یدان بۆ داکۆکی کردن له‌و کێسانه‌ و بوونه‌ پشتیوانی ناوه‌نده‌که‌تان ناوه‌ندی قه‌ڵادزێ له‌ ده‌ره‌وه‌ و ناوه‌ی ووڵات و چه‌ندین کۆمیته‌ی پشتیوانیتان پێک هێناوه. چونکا گومانی تێدا نیه له‌ ئاکامی ئه‌و خۆنه‌ویستی و جوامێریه‌‌ی ئێوه‌ی شۆڕشگێر، خه‌ڵکی ده‌روون نزم و نه‌خۆش هه‌ن له‌ ناو کۆمه‌ڵگاکه‌ماندا که‌ ئیره‌یتان پێ ده‌به‌ن و پلان گێڕی ده‌که‌ن بۆ که‌م کردنه‌وه‌ له‌سه‌ر وه‌ریه‌کانتان. ئێمه‌ وه‌ک ناوه‌ندی قه‌ڵادزێ، خۆشه‌ویستی و ته‌بای و یه‌کگرتووی نێوان خۆمان به‌ باشتری چاره‌سه‌ر و خۆپاراستن له‌و ده‌رون نه‌خۆشانه ده‌زانین.
ڕێزداران تاقی کردنه‌وه‌ی ژیان سه‌لماندوویه‌تی که ته‌نها سه‌رڕاستی، ده‌ست و داوین و زمان پاکی به‌ ئامانجه‌کانمان ده‌گه‌یه‌نێت، دووڕووی و دڕدۆنگی و قسه‌ و قسه‌ڵۆک بۆ که‌س به‌ری نه‌داوه‌ ، بۆیه‌ ده‌بێت نه‌فره‌تی لێ بکه‌ین نه‌ک خوا نه‌خواسته‌ بیکه‌ین به‌ پیشه! هه‌ڵبه‌تا ئێوه‌‌ی به‌ڕێز زۆر له‌وه‌ گه‌وره‌ترن که‌ ئه‌و ئاگاداریانه‌تان پێ ڕابگه‌یه‌نین، به‌ڵام ئێمه‌ پێمان وایه خۆ پاراستن باشتره له‌ چاره‌سه‌ر کردن!
ئومید ده‌که‌ین به‌ پشتیوانی خوا و ڕۆڵه‌ دڵسۆزه‌کانی میلله‌ته‌که‌مان بتوانین ببینه‌ ڕێچکه‌ شکێن و پێشه‌نگی گه‌ڕاندنه‌وه‌ی ڕێز و حورمه‌ت و خۆشه‌ویستی ناو ڕیزه‌کانی کۆمه‌ڵگاکه‌مان. گومانی تێدانیه‌ ته‌نها به‌یه‌کتر گه‌وره‌ کردن ده‌توانین هه‌موو مافه‌کانی گه‌له‌که‌مان به‌ده‌ست بهێنین.

یه‌کگرتووتربێت ڕێزه‌کانی که‌س وکاری شه‌هیدان و جینۆساید کراوانی کوردستان
شه‌کاوه‌تر بێت ئاڵای کوردستان که‌ به‌ خوێنی شه‌هیدان به‌ر قه‌رار بووه

ده‌سته‌ی هه‌ڵسوڕێنه‌ری ناوه‌ندی قه‌ڵادزێ
بۆ داکۆکی کردن له قوربانیان و زه‌ره‌رمه‌ندانی ده‌ڤه‌ری پشده‌ر
دکتۆر چیمه‌ن حه‌سه‌ن حاجی مه‌حمود
دکتۆر محه‌مه‌د پشده‌ری
حه‌مه‌ زرنگ
حه‌سه‌نی حاجی عه‌لی
مامۆستا عومه‌ر کاکل
مامۆستا جه‌بار جه‌مال گه‌ریب
خالید ئه‌حمه‌د ئاسنگه‌ر

 

...
... ... ...